Ջավախքի Գումբուրդո գյուղի բնակիչները սեպտեմբերի 30-ին ցանկացել են խաչքար տեղադրել տեղի 10-րդ դարի եկեղեցու բակում՝ նախնիների գերեզմանների վրա, սակայն ոստիկանները թույլ չեն տվել մտնել եկեղեցու բակ: Նրանք հայտարարել են, թե այդպիսի հրաման ունեն:

Բնակիչները մտադիր չեն ցրվել և փորձում են ճեղքելով անցնել ոստիկանների պատնեշը: Գյուղում սպասում են իշխանությունների ներկայացուցիչներին, գրում է Jnews-ը:

Շրջկոմի նախկին պատգամավոր, իսկ այժմ պատգամավորության թեկնածու Աշատ Սահարյանը կոչ է արել բնակիչներին ցրվել և տեղադրել խաչքարը հոկտեմբերի 4-ին: Ըստ նրա, այդ օրն արդեն հնարավոր կլինի առանց խնդիրների տեղադրել խաչքարը: Սակայն բնակիչները երաշխիքներ են պահանջում և ասում են, որ չեն ցրվի մինչև որ վստահ չլինեն, որ խաչքարը կտեղադրվի:

Ավելի ուշ իրավիճակն էլ ավելի է սրվել: Ոստիկանների և բնակիչների միջև լարվածությունը թեժացել է, հնչել են կրակոցներ, դեպքի վայր են ժամանել հատուկ նշանակության ջոկատայիններ:

2016-ի ամռանը Գումբուրդոյի եկեղեցում վերականգնողական աշխատանքներ են սկսվել: Եկեղեցու բակում հայտնաբերվել են մարդկային ոսկորներ, որոնք բնակիչների պնդումներից հետո վերաթաղվել են: Խնդրին պատշաճ լուծում տալու համար բնակիչները բազմիցս են հանդիպումներ կազմակերպել հայ և վրաց հոգևորականների հետ: