«ՕՍՄ» հիմնադրամը (Awesome Foundation Yerevan) հայտարարել է 2017թ. հոկտեմբեր ամսվա հաղթող երկու ծրագրերը` Արա Հարությունյանի «ՆորՇենԼաբ»-ը և Մարիաննա Փահլևանյանի «Առողջանոց տիկնիկաթերապևտիկ նախագիծը»: Ծրագրերից յուրաքանչյուրը կստանա 1000-ական դոլար. գումարը կուղղվի ծրագրերի իրականացմանը:
«ՕՍՄ» հիմնադրամը անկախ մարդկանց խումբ է, որն աջակցում է իրականությունն ավելի լավը դարձնող գաղափարներին: Յուրաքանչյուր ամիս հիմնադրամը տրամադրում է 1,000 դոլարին համարժեք փոքր դրամաշնորհ տվյալ ամսվա հաղթող նախագծին: «ՕՍՄ» թիմը հնարավորություն է ընձեռնում դիմորդներին իրականացնել սեփական մտահաղացումները, որոնք կարող են նպաստել մեր հասարակության բարելավման գործընթացին:
«ՆորՇենԼաբ»-ի նպատակն է Արցախի Նորշեն դպրոցում սովորող երեխաների կրթական գործընթացն ավելի ինտերակտիվ ու հետաքրքիր դարձնել դասասենյակների սեղաններին վահանակներ ամրացնելու միջոցով: Գաղափարի իրականացումը հնարավորություն կընձեռնի ուսուցիչներին կազմակերպել արտաժամյա տարատեսակ մրցույթներ և խաղեր:
«Առողջանոց տիկնիկաթերապևտիկ նախագիծը» նպատակ ունի տիկնիկների միջոցով օգնել ստացիոնար բուժում ստացող երեխաներին հաղթահարել հիվանդանոցային իրավիճակի հետ կապված հոգեբանական և ֆիզիկական անհարմարավետությունը, ինչպես նաև ուղղակի ուրախացնել նրանց:
