Գրող և գինու սիրահար Հենրի Ջեֆրիսը վերջերս Հայաստան կատարած այցի ընթացքում բացահայտել է Հայաստանի գինեգործական հարուստ ավանդույթները:

The Spectator-ում հեղինակը պատմել է հայկական գինու պատրաստման հնագույն տեխնոլոգիայի մասին: «Վայոց ձորի մարզում՝ դեպի Իրան տանող մայրուղու յուրաքանչյուր 100 մետրի վրա լոլիկ, ձմերուկ և Coca-Cola են վաճառում: Երբ մոտենում ես, պարզվում է, որ, խորամանկորեն, Coca-Cola-ի շշերի մեջ կարմիր գինի է լցված, որն աննկատ տեղփոխվում է Իրան»,- գրում է հեղինակը:

Վայոց ձորում գրողը համտեսել է խաղողի տարբեր տեսակներից պատրաստված հայկական գինի: «Զորիկ և Երազ Ղարիբյանները գինին պատրաստում են միևնույն՝ խաղողի արենի տեսակից, սակայն ստանում են բոլորովին տարբեր համ ունեցող գինիներ: Գինու համտեսի մոտակա «Զորահ» սրահում մատուցվող կարմիր «Կարաս» գինին Լոնդոնի խանութներում վաճառվում է £25 –ով»,-գրում է Հենրի Ջեֆրիսը:

«Զորահ»-ի երկու հիմնադիրներ էլ՝ Զորիկն ու Երազը, սփյուռքահայեր են: Նրանք ցանկանում էին խաղողի այգիներ ձեռք բերել Իտալիայի Տոսկանա նահանգում, սակայն 1998 թվականին հայրենիք այցից հետո, որոշեցին գինեգործությամբ զբաղվել Հայաստանում: