Ռուս-թուրքական գործակցությունը, ինչպես նաև Ադրբեջանի հետ հարաբերություններում Մոսկվայի նախաձեռնողականությունը և այս երկրին միլիարդավոր դոլարների զենքի վաճառքը ցույց են տալիս, որ միայն Ռուսաստանի նկատմամբ վստահությունը կարող է աղետալի հետևանքներ ունենալ Հայաստանի համար: Այդ մասին գրում է ամերիկյան աշխարհաքաղաքական վերլուծական Stratfor հարթակը:
«Ռուսաստանի և ԱՄՆ-ի միջև ռազմավարական ներկայիս հակասությունները բարդացնում են Հայաստանի՝ հավասարակշռված արտաքին քաղաքականություն վարելու ջանքերը: ՌԴ-ին սանձելու Արևմուքտի հռետորաբանությունը կարող է նույնիսկ կոշտ ճնշման տակ դնել Հայաստանի՝ ՆԱՏՕ-ի և ԱՄՆ-ի հետ գործակցումը: Սակայն Հայաստանի ազգային շահը պահանջում է առնվազն պահպանել արևմտյան ինստիտուտների և, հատկապես, ԱՄՆ-ի հետ գործակցության ներկայիս մակարդակը: Կարճաժամկետ հեռանկարում Հայաստանի արտաքին քաղաքականությունը կարող է լուծել Արևմուտքի հետ գործակցության հարցը՝ խուսափելով Ռուսաստանի հետ դաշնակցային հարաբերությունները վտանգելուց և վերջինիս զայրույթը հարուցելուց», - գրում է հարթակը:
Անդրադառնալով Ապրիլյան պատերազմին և ԼՂ հակամարտության շուրջ դրան հաջորդած զարգացումներին, հարթակը գրում է, որ Ադրբեջանը մերժում է 2016-ին Վիենայի և Սանկտ Պետերբուրգի՝ ԵԱՀԿ Միսնկի խմբի լիազորությունների ընդլայնման և առաջնագծում հսկող մեխանիզմների ներդրման առաջարկությունները, մինչդեռ Հայաստանը համարում է դրանք հետագա բանակցությունների հիմնական նախապայմաններ:
