27 հունվարի 2018 - 10:34 AMT
2017-ին գյուղմթերքի արտահանումն աճել է 21%-ով

2017-ին Հայաստանի գյուղմթերքի արտաքին առևտրի դրական հաշվեկշիռ է արձանագրվել. արտահանումն աճել է 21%-ով, ներմուծումը՝ 17%-ով: ՀՀ կառավարության տեղեկատվության և հասարակայնության հետ կապերի վարչության փոխանցմամբ, այս մասին վարչապետ Կարեն Կարապետյանի հետ հանդիպմանն ասել է գյուղատնտեսության նախարար Իգնատի Առաքելյանը:

Նրա խոսքով, գյուղատնտեսության մասնաբաժինը երկրի ՀՆԱ-ում 2016 թվականիվ կազմել է 15,9%, իսկ 2017-ի հունվար-նոյեմբեր ամիսներին՝ 21,6%:

«Առաջնահերթ անհրաժեշտ պարենամթերքների ինքնաբավության մակարդակը կազմել է 64%, գյուղատնտեսությունում զբաղվածների թիվը՝ 338. 000 մարդ, որը ընդհանուր զբաղվածության 33,6%-ն է կազմում»,- ասել է նախարարը:

Նախարարի տեղեկացմամբ, 2017-ի ընթացքում աճել են նաև գյուղմթերքի մթերման ծավալները, մասնավորապես՝ պտղի մթերումն աճել է 21%-ով, բանջարեղենինը՝ 11%-ով, խաղողինը՝ 1%-ով:

Նշվել է, որ նախորդ տարվա ընթացքում հանրապետությունում արտադրվել է 9 մլն լիտր գինի՝ 2016-ի 7 մլն-ի փոխարեն, իսկ արտահանումն աճել է 30%-ով: