Ֆրանսիայի հրապարակում մեկնարկել է ՀՀ նախկին նախագահ Սերժ Սարգսյանի վարչապետության դեմ պայքարող ընդդիմության հանրահավաքը: Այն բազմամարդ է:
Հարթակում «Քաղաքացիական կուսակցության» «Իմ քայլը» նախաձեռնության անդամ Նիկոլ Փաշինյանն է: Նա հայտարարել է, որ Հայաստանում հեղափոխական իրավիճակ է:
«Ես հայտարարում եմ Հայաստանում ոչ բռնի, «թավշյա» հեղափոխության մեկնարկը», - ասում է Փաշինյանը:
15:23 Լարված իրավիճակ է Գրիգոր Լուսավորիչ փողոցում: Ոստիկանները ուժ են կիրառել ցուցարարներից մեկի նկատմամբ: Հատուկ ջոկատայինները ցուցարար էին բռնել, որին ազատ արձակեցին ցուցարարների պահանջով:
14:50 Լարված իրավիճակ է ցուցարարների և ոստիկանների միջև: Ցուցարարները արգելափակել են Հաղթանակի կամուրջը:
14:46 Ցուցարարները շարժվում են Գրիգոր Լուսավորիչ փողոցով դեպի Արշակունյաց պողոտա: Նրանք մտադիր են արգելափակել այն:
13:42 Ցուցարարները մտել են արդարադատության և արտգործ նախարարության շենքերի բակ: «Ամոթ-ամոթ» վանկարկում են ցուցարարները նախարարությունների աշխատակիցներին:
13:37 Շրջափակվել է նաև Կենտրոնական բանկի շենքը:
13:32 Նիկոլ Փաշինյանի փոխանցմամբ, Մոսկվայում ՀՀ դեպանատան առջև նստացույց են իրականացնում հայ համայնքի ներկայացուցիչները:
13:30 18:30-ին Հանրապետության հրապարակում տեղի կունենա ընդդիմության հանրահավաքը:
13:11 ՊԵԿ-ի շենքը ևս շրջափակվել է: Ակտիվիստները հսկում են գերատեսչությունների մուտքերը:
13:01 Ցուցարարները շրջափակել են ԱԳՆ-ի շենքը:
12:52 Ցուցարարներն այժմ Վազգեն Սարգսյան փողոցով շարժվում են դեպի կառավարության նոր մասնաշենք: Նրանք այժմ շրջափակել են Դատախազության շենքի մուտքերը:
12:46 Ցուցարարներն Աբովյան փողոցով հասնում են Հանրապետության հրապարակ:
12:35 Այժմ ցուցարարները երթով շարժվում են կառավարական որևէ շենք շրջափակելու: Նրանք ուղղություն վերցրեցին դեպի Սայաթ-Նովա փողոց:
12:25 Նիկոլ Փաշինյանն ասում է, որ շրջափակելու են կառավարական շենքերը:
«Մեր պայքարը պետք է լինի «բաց ձեռքերի» պայքար, բայց մենք պետք է կաթվածահար անենք ողջ պետական համակարգը, և իշխանությունը պետք է անցնի ժողովրդին: Կապ չունի նրանք ինչ կանեն Սերժ Սարգսյանի հետ այն շենքում (ԱԺ շենք-խմբ.) կատարվողն այլևս ազդեցություն չպետք է ունեա ՀՀ-ի քաղաքական կյանքի վրա», - ասել է Փաշինյանը՝ հավելելով, որ Սարգսյանը չպետք է կարողանա կառավարել: