ՀՀ վարչապետ Նիկոլ Փաշինյանը ոստիկանության զորքերի կազմավորման 26-րդ տարեդարձին նվիրված հանդիսավոր արարողության ընթացքում հայտարարել է, որ երկրում տեղի է ունենում «իրավապահ համակարգի և ժողովրդի հաշտեցման պատմական գործընթաց»: Այս մասին հայտնում է ՀՀ կառավարության տեղեկատվության և հասարակայնության հետ կապերի վարչությունը:
«Ցավոք, մեր պատմության մեջ եղել են էջեր, երբ լրջագույն անդունդ են ստեղծել ժողովրդի և ոստիկանության միջև և մեր գործունեության առաջնահերթությունն է այդ անդունդը լրացնելը, այդ անդունդը փակելը, այդ անդունդի վրա կամուրջներ կառուցելը, որպեսզի ժողովուրդը և ոստիկանությունը լինեն միասնական, լինեն գծերի նույն կողմում, ծառայեն միևնույն նպատակին, առաջնորդվեն նույն սկզբունքներով, երազանքներով և միասնական ուժերով», - ասել է Փաշինյանը:
Միջոցառման ընթացքում վարչապետը ծանոթացել է ոստիկանության զորքերի տեխնիկական հագեցվածության մակարդակին, ինչպես նաև այն հատուկ միջոցներին, որոնք ոստիկանությունը կարող է կիրառել հասարակական կարգի խախտման դեպքում: Նա հանձնարարել է վերանայել որոշ միջոցների կիրառման հնարավորությունը՝ հաշվի առնելով դրանց վտանգավորության աստիճանը:
