Նախարարը՝ անցումային արդարադատության մասին. Արտակարգ դատարաններ չեն ստեղծվի, Սահմանադրությունը չի խախտվի
ՀՀ Արդարադատության նախարար Արտակ Զեյնալյանը հայտարարել է, որ անցումային արդարադատության ստեղծումը Հայաստանում չի խախտելու ՀՀ Սահմանադրության որևէ կետ, հայտնում է ՀՀ կառավարության տեղեկատվության և հասարակայնության հետ կապերի վարչությունը:
«Արտակարգ դատարաններ չեն ստեղծվելու, անցումային արդարադատությունը չի հակասելու ՀՀ Սահմանադրությանն ու կոնվենցիաներով, միջազգային պայմանագրերով ստանձնած պարտավորություններին: Դա լինելու է օրինական», - ասել է Արտակ Զեյնալյանը՝ հավելելով, որ չեն լուծարվելու դատարանները, դատարանների դատարան չի ստեղծվելու:
Ավելի վաղ, ՀՀ վարչապետ Նիկոլ Փաշինյանը, անդրադառնալով հայաստանյան դատական համակարգի լրջագույն խնդիրներին, հայտարարել է անցումային արդարադատություն ստեղծելու մասին:
