Վրաստանը միջոցներ է փնտրում Թուրքիայի արեւելքում պատմական տաճարի վերականգնման համար: Ինչպես գրում է Today's Zaman թերթը, այդ մասին հայտարարել է Էրզրումի շրջանի պաշտոնական ներկայացուցիչը, որտեղ էլ գտնվում է Օշկվանք վանական համալիրը` կառուցված 963-973 թվականներին: Այն ներառում է եկեղեցի, հացատուն եւ մատենագրության համար նախատեսված շինություն, նվիրված է Սուրբ Հովհաննես Մկրտչին: Տաճարը հանդիսանում է խաչաձեւ գմբեթավոր եկեղեցիների շարքում ամենամեծերից մեկը տարածաշրջանում եւ իր նշանակությունը պահպանել է մինչեւ 15-րդ դարավերջ: «1985 թվականին Թուրքիայի մշակույթի նախարարությունը համալիրը ներառել է երկրի ազգային ժառանգության ցանկում, ինչը շատ կարեւոր է վրացի զբոսաշրջիկների համար, ովքեր այցելում են Թուրքիա»,- նշում է թերթը:

«Արեւմտյան Հայաստանի տարածքում, առավել եւս այդ շրջանում վրացական եկեղեցիներ չեն եղել»,- PanARMENIAN.Net-ի թղթակցին հայտնել է Հայոց ցեղասպանության ինստիտուտ-թանգարանի տնօրեն, պատմաբան Հայկ Դեմոյանը: Նրա խոսքերով, Օշկվանք եկեղեցին պատկանում է հայ-քաղակեդոնացիներին: «Տաճարի վրա խաչ է եղել, որն որոշակիորեն տարբերվում էր առաքելականից, հետագայում այն ընդհանրապես փոխարինվեց ուղղափառով: Զարդամոտիվներից մեկի վրա հին վրացերեն արձանագրություն կա, ինչը Վրաստանին հիմքեր է տալիս տաճարը վրացական համարելու համար»,- նշել է Դեմոյանը:

Ներկա դրությամբ, Էրզրումը հանդիսանում է Թուրքիայի Հանրապետության իսլամական կենտրոններից մեկը, որտեղ ոչինչ չի խոսում ժամանակին այս տարածքում ապրած ժողովրդի մասին: Շրջանի տարածքում պահպանվել են մոտ 10 հայկական տաճար, որոնցից գլխավոր են Սուրբ Աստվածածինը եւ Կարմիր վանքը, որոնք ավերված են: