Բելգիայի կառավարության ղեկավար Շառլ Միշելը խորհրդարանի նիստում հայտարարել է իր հրաժարականի մասին:
Ավելի վաղ խորհրդարանի երկու խմբակցություն քննարկման էր դրել նախարարների կաբինետին անվստահություն հայտնելու հարցը: Անցած շաբաթ հրաժարական տվեց կառավարության 5 անդամ, որոնք ներկայացնում էին ֆլամանդացի ազգայնականներին՝ որպես բողոքի նշան վարչապետի կողմից ՄԱԿ միգրացիոն պակտի ստորագրման դեմ: Դրանից հետո իշխող կոալիցիան փոքրամասնություն դարձավ:
«Ես տեսա, որ իմ կոչը խորհրդարանին համոզիչ չէր, որ այն չընկալվեց, գոնե այս փուլում: Ես պետք է հարգեմ և ընդունեմ այս իրավիճակը, ուստի որոշել եմ հայտնել իմ հրաժարականի մասին և անհապաղ գնալ թագավորի մոտ»,-ասել է կառավարության ղեկավարը, գրում է ՌԻԱ Նովոստին RTBF հեռուստաալիքի վրա հղումով:
Դրանից հետո նիստը դադարեցվել է:
Հեռուստաալիքը նշում է, որ թագավորը կարող է ինչպես ընդունել, այնպես էլ մերժել հրաժարականը:
