Նիկարագուայի ԱԳՆ ղեկավար Սամուել Սանտոս Լոպեսը հուսով է, որ իր երկրի աջակցությունը Ռուսաստանին Հարավային Օսեթիայի եւ Աբխազիայի անկախության ճանաչման հարցում կնպաստի հակամարտության դադարեցմանը Կովկասում: «Մենք ուրախ ենք, որ հարաբերությունները Ռուսաստանի եւ Նիկարագուայի միջեւ գնալով մերձենում են տարբեր ոլորտներում, մենք նաեւ Ռուսաստանի կողմն էինք Հարավային Օսեթիայի եւ Աբխազիայի անկախության ճանաչման հարցում: Մենք հուսով ենք, որ դա կարեւոր պահ էր վերջ դնելու համար զանգվածային սպանություններին, որոնք այնտեղ կատարվում էին եւ թույլ տալու համար այդ ժողովրդներին անկախություն եւ ազատություն ունենալ: Մենք հուսով ենք, որ դա կօգնի բազմակողմ մոտեցում հաստատել խաղաղության հանդեպ»,-ասել է Նիկարագուայի ԱԳՆ ղեկավարը շաբաթ օրը ՌԴ ԱԳՆ ղեկավար Սերգեյ Լավրովի հետ Մոսկվայում կայացած հանդիպմանը, հաղորդում է ՌԻԱ Նովոստի գործակալությունը:

Նիկարագուայի նախագահ Դանիել Օրտեգան սեպտեմբերի սկզբին պաշտոնական հրամանագիր է ստորագրել Հարավային Օսեթիայի եւ Աբխազիայի անկախության ճանաչման վերաբերյալ: Նիկարագուան Ռուսաստանից հետո առաջին պետությունն էր, որ ճանաչեց կովկասյան այդ հանրապետությունների անկախությունը: