«Հավաքական անվտանգության պայմանագրի կազմակերպությունը դեռեւս համագործակցության մասին համաձայնագիր չունի ՆԱՏՕ-ի հետ: Այնուամենայնիվ, ցանկացած երկիր իրավունք ունի համագործակցել ցանկացած դաշինքի հետ, եթե նա կատարում է իր պարտավորությունները ՀԱՊԿ-ի առջեւ»,-Երեւանում կայացած մամլո ասուլիսում հայտարարել է ՀԱՊԿ գլխավոր քարտուղարի տեղակալ Տոկսատին Բուզուբաեւը: Նրա խոսքերով, Ռուսաստանը եւս համագործակցության ծրագիր ունի ՆԱՏՕ-ի հետ, ինչպես Հայաստանը: «Սակայն որքան ես գիտեմ, Հայաստանը չի պատրաստվում անդամակցել ՆԱՏՕ-ին: Նա կարող է համագործակցել ՆԱՏՕ-ի հետ ցանկացած ծրագրերով, եթե դա չի հակասում ՀԱՊԿ կանոնադրությանը»,-ընդգծել է Բուզուբաեւը:

Հայաստանը ՀԱՊԿ անդամ է, սակայն համագործակցում է ՆԱՏՕ-ի հետ Անհատական գործընկերության ծրագրի շրջանակներում: