Երևանյան շենքերից մեկում կորոնավիրուսից մահացածի դուստրը հոր անկողնային պարագաները թողել է շքամուտքում, ամբողջ գիշեր խանգարել հարևաններին՝ մեղադրելով նրանց անտարբերության մեջ: Այդ մասին ֆեյսբուքյան հրապարակում է արել օգտատեր Լուսինե Նահապետյանը։

Նա նշել է, որ 90 բնակարան ունեցող շենքի հարկերում պատուհաններ չկան, օդափոխության խնդիր կա, իսկ այդ կինը հոր անկողնային պարագաները պատերին հպելով իջեցրել է ներքև։

«Նաև հեռախոսով ահաբեկում էր, որ չի ստորագրելու, որ հայրը կորոնավիրուսից է մահացել, ու բերելու է դին տուն, որ ինքն իր ձեռքով հուղարկավորի»,- գրել է նա։

Քաղաքապետի մամուլի խոսնակ Հակոբ Կարապետյանը PanARMENIAN.Net-ին ասաց, որ տեղյակ են խնդրից, վարչական շրջանի ղեկավարը կազմակերպել է շենքի խորքային ախտահանում։

Գրառման հեղինակը նշել է նաև, որ շենքի բնակիչները Ոստիկանություն են դիմել։

Ոստիկանությունից հայտնեցին, որ դեպքի հետ կապված ահազանգ ստացվել են, այս պահին նյութեր են նախապատրաստվում։

Հայաստանում հունիսի 18-ի դրությամբ կորոնավիրուսով վարակի դեպքերը հասել են 18,698-ի։ Ընդհանուր առմամբ, կորոնավիրուսից մահվան 309 դեպք կա, այլ պատճառով՝ 101։ Առողջացածների ընդհանուր թիվը 7560 է։