Կորոնավիրուսի երկրորդ ալիքը Ռուսաստանում սպասվում է մոտավորապես հոկտեմբեր-նոյեմբերին։ Այդ մասին հայտարարել է վիրուսաբան Անատոլի Ալտշտեյնը։

Ըստ նրա՝ այժմ այլ երկրների օրինակով կարելի է դատել, թե ինչպիսին կլինի երկրորդ ալիքը։ Օրինակ՝ Իսրայելում Covid-19-ից մահերը երկու անգամ պակասել են՝ հիվանդների 1,5 տոկոսից մինչև 0,7 տոկոս։

Սակայն, ըստ մասնագետի՝ այս ալիքն ավելի մասշտաբային է վարակվածների առումով։ Սինգապուրում 50,000 վարակվածից մահացել է 24 մարդ՝ դա 0,7 տոկոս է։ Իսկ Մերձավոր Արևելքում մահացությունը նույնպես 1 տոկոսից պակաս է, գրում է «Կոմսոմոլսկայա պրավդան»։

«Եթե ամբողջ աշխարհում մահացությունն այդպիսին լիներ, մենք մեծ ուշադրություն չէինք դարձնի վիրուսին։ Հուսով եմ՝ դա կարող է ընդհանուր օրինաչափություն լինել՝ հիվանդացությունը կարող է մեծ լինել, մահացությունը՝ փոքր»,- ասել է նա։

Մասնագետը հավելել է, որ ամռանը վիրուսի ակտիվությունը չմարեց, ինչպես ակնկալվում էր, թեև որոշ չափով նվազեց։ Նա նշել է նաև, որ հասարակությունը դեռ ձեռք չի բերել կոլեկտիվ իմունիտետ։ Ալտշտեյնը նշել է, որ դրա համար հարկավոր է 5 մլն մարդու պատվաստել։

Ավելի վաղ ասվել էր, որ ՌԴ-ում կորոնավրուսի 2-րդ ալիքի ռիսկ կա, որը կարող է սկսվել ճամփորդող ռուսաստանցիների պատճառով։

Օգոստոսի 5-ին ՌԴ-ում կորոնավիրուսով վարակի 5204 նոր դեպք է գրանցվել՝ ընդհանուր առմամբ հասնելով 866,627-ի։ Մահվան 14,490 դեպք է գրանցվել, ապաքինվել է 669,026-ը։