Մալիի նախագահ Իբրահիմ Բուբաքար Քեյթան հայտարարել է իր հրաժարականի և խորհրդարանի լուծարման մասին: Նա նման հայտարարություն է արել իր և երկրի վարչապետ Բուբա Սիսեի՝ ապստամբած զինվորականների կողմից ձերբակալվելուց ժամեր անց։ Այս մասին հայտնում է BBC-ն։
Նա հեռուսատաուղերձում նշել է, որ չի ցանկանում, որ հանուն իր իշխանության արյուն թափվի, իրեն այլ ելք չի մնում։
Բուբաքար Քեյթան նախագահական ընտրությունները հաղթել էր 2018-ին։
Հեղաշրջումը սկսվել է Մալիի մայրաքաղաք Բամակոյի մոտ գտնվող ռազմաբազաներից մեկում օգոստոսի 18-ին։ Հայտնի չէ՝ ինչն է խռովության պատճառը և ինչքան մարդ է մասնակցում դրան։ ԶԼՄ-ների վարկածներից մեկով պատճառն աշխատավարձների վերաբերյալ տարաձայնություններն են եղել։ Հայտնի է, որ ապստամբությունը ղեկավարում են բարձրաստիճան զինվորականներ։
ՄԱԿ-ի գլխավոր քարտուղար Անտոնիո Գուտերեշը կոչ է արել անհապաղ վերականգնել Մալիում սահմանադրական կարգն ու ազատել երկրի ղեկավարներին: