Սեպտեմբերի 3-ից 7 օրվա մեջ Արցախի ամբողջ տարածքն ունենալու է 3G կապի հնարավորություն, իսկ 4G Ստեփանակերտում և մնացած խոշոր բնակավայրերում ծրագրվում է 2021-ին։ Այս մասին հայտարարել է Արցախի նախագահ Արայիկ Հարությունյանը՝ նշելով, որ սեպտեմբերի 2-ի գիշերը վերագործարկվելու են նոր կայանները։

Արցախում լինելու է Հայաստանի որակի կապ՝ ՀՀ գնին համապատասխան:

«Հունվարի 1-ից կտրուկ լինելու է առաջին նվազեցումը, երկրորդը՝ հունիսի կամ հուլիսի 1-ից, իսկ 22 թվականի հունվարի 1-ից ունենալու ենք Հայաստանի գնին համապատասխանող կապ, անկախ նրանից նոր օպերատոր կլինի», թե չի լինի»,- նշել է նա։

Հարությունյանի խոսքով՝ նոր օպերատոր գտնելու հետ կապված լուրջ առաջարկություն երբևէ չեն ունեցել և չեն էլ ունենալու, դրա համար նպատակն է գոնե առկա օպերատորի հետ գալ համաձայնության:

Նա հիշեցրել է, որ «Ղարաբաղ Տելեկոմի» մենաշնորհային պայմանագիրը կնքվել է 2002-ից 30 կամ 35 տարի ժամկետով:

Ըստ նրա՝ որպես վարչապետ պաշտոնավարման վերջին օրերին Ucom–ին, MTS-ին, «Վեոն Արմենիա» ՓԲԸ-ին (Beeline-ին) հրավիրել է Արցախում կապի բնագավառում ծառայություններ մատուցելու, երկուսի պատասխանը բացասական է եղել, իսկ Ucom-ը պատասխան չի տվել:

«Մինչև հրաժարականս, օրեր առաջ եղել եմ Լիբանանում և հանդիպել եմ «Ղարաբաղ Տելեկոմի» միակ սեփականատեր Պիեր Ֆատուշի հետ, և մենք համատեղ մշակել ենք ճանապարհային քարտեզ, որը թույլ է տալու Արցախում ունենալ բարձրակարգ և մատչելի գներ»,- ասել է նա: