4 սեպտեմբերի 2020 - 13:48 AMT
Մակունց․ Դիմակ կրելը պարտադիր կլինի նաև ԱԴ ավարտից հետո

Արտակարգ դրության ռեժիմի ավարտից հետո էլ դիմակ կրելը պարտադիր կմնա, հայտարարել է «Իմ քայլը» խմբակցության ղեկավար Լիլիթ Մակունցը, փոխանցում է Aysor.am-ը:

«Քանի որ մեր երկրում համավարակի տվյալներն այնպիսին չեն, որ սահմանափակումներն ամբողջովին վերացվեն, անհրաժեշտ են օրենքներ, որոնք հնարավորություն կընձեռեն վերահսկել իրավիճակը, մասնավորապես՝ դիմակ կրելը»,- ասել է նա:

Սեպտեմբերի 4-ին հայտարարվել է, որ Հայաստանում կորոնավիրուսի պանդեմիայի պատճառով հայտարարված արտակարգ դրության ռեժիմի ավարտից հետո անհրաժեշտության դեպքում կարանտին կարող է սահմանվել, օրենքն արդեն առաջին ընթերցմամբ ԱԺ-ն ընդունել է։ Կարանտին հայտարարելու դեպքում այն կարող է 6 ամիս տևել՝ հետագայում ևս 6 ամսով երկարացվելու հնարավորությամբ։

Հայաստանում սեպտեմբերի 4-ի դրությամբ կորոնավիրուսով վարակի դեպքերը հասել են 44,461-ի։ Ընդհանուր առմամբ կորոնավիրուսից մահվան 891 դեպք կա, այլ պատճառով՝ 272։ Առողջացածների ընդհանուր թիվը 39,257 է, փաստացի բուժվողներինը՝ 4041 է։