Արցախյան բանակցություններն առանց նախապայմանների շարունակելու վերաբերյալ ԵԱՀԿ Մինսկի խմբի համանախագահների հայտարարությունը կառուցողական է, հայտարարել է վարչապետ Նիկոլ Փաշինյանը։
Նա շեշտել է որ հայկական կողմը նախապայմաններ չի դնում, նախապայման դնում է Ադրբեջանը` հայտարարելով, որ Ղարաբաղը պետք է լինի բացառապես այդ երկրի մաս։
Նա նաև նշել է, թե ՀՀ և Ադրբեջանի արտաքին գործերի նախարարների միջև սեպտեմբերի 21-27-ը պլանավորված հանդիպման մասին լուրերն իրականությանը չեն համապատասխանում։
«Հանդիպում այս պահին նախատեսված չէ, կան քննարկումներ, և ես կարող եմ ասել, որ ԵԱՀԿ ՄԽ համանախագահների առաջարկությունը համարում եմ կառուցողական, և հայտարարությունը մեր բանակցային գործընթացը շարունակելու համապատասխանում է մեր պատկերացումներին»,- ասել է Փաշինյանը։
Սեպտեմբերի 14-ին ԵԱՀԿ ՄԽ համանախագահները հեռախոսազրույց էին ունեցել Հայաստանի և Ադրբեջանի ԱԳ նախարարների հետ և, ըստ հաղորդագրության, առաջիկա շաբաթվա ընթացքում նրանց հետ հանդիպելու պայմանավորվածություն ձեռք բերել: