Վարշավայի ֆոնդային բորսան Հայաստանի Կենտրոնական Բանկի հետ ստորագրել է պայմանաթերթ` ՀՀ բորսայի 65%-ը ձեռք բերելու բանակցությունների վերաբերյալ:

Հայաստանի ֆոնդային բորսայի 100%-ի նախնական գնահատված արժեքը $1․6 մլն է։

Կենտրոնական բանկը տնօրինում է Հայաստանի ֆոնդային բորսայի 90.1%-ը: Մնացած 9.9%-ը բորսայի ​​բաժնետոմսերն են: Գործարքից հետո ԿԲ-ն կպահպանի դրա 25%-ը, իսկ մնացած 10%-ը ձեռք կբերի երրորդ կողմը, որին նշանակելու է ՎՖԲ-ն:

Նշվում է, որ համաձայնությունը պարտադիր բնույթ չի կրում: Ձեռքբերման վերջնական պայմանները կախված կլինեն նաև համապատասխան կորպորատիվ հավանությունների արդյունքներից:

«Կարծում եմ՝ ՎՖԲ-ի կողմից Հայաստանի ֆոնդային բորսայի ձեռքբերումը կնպաստի Հայաստանի կապիտալի շուկայի արագ աճին, իսկ Վարշավայի ֆոնդային բորսան կկարողանա գոհացուցիչ եկամտաբերություն ապահովել ներդրումից: Կարևոր է նաև այն հանգամանքը, որ Լեհաստանը նպաստում է զարգացող շուկաների կայացմանը, ինչը լավ ուղղություն է», - ասել է Լեհաստանի փոխվարչապետ և պետական ​​ակտիվների նախարար Յացեկ Սասինը:

Ըստ ԿԲ հաղորդագրության՝ հաջորդ քայլով ՎՖԲ-ն կկատարի համալիր ուսումնասիրություն, կմշակի Հայաստանի արժեթղթերի բորսայի զարգացման հնգամյա ծրագիր` ԿԲ-ի և Հայաստանի ֆոնդային բորսայի հետ համատեղ, և կսահմանի ներդրումային համաձայնագրի վերջնական պայմանները, որոնք կարող են տարբերվել շրջանակայինից:

ՀՖԲ-ի հիմնական գործը ֆինանսական գործիքներով առևտրի կազմակերպումն է և Հայաստանում ֆինանսական գործիքներով գործարքների համար քլիրինգային տան և վճարահաշվարկային ընկերության գործունեության իրականացումը: