Հայաստանն արժևորում է բարեկամ Կիպրոսի հետ փոխադարձ հարգանքի և վստահության վրա հիմնված միջպետական գործակցությունն ու գերազանց քաղաքական երկխոսությունը, որոնք, տարեցտարի ամրապնդվելով և ընդլայնվելով, ձեռք են բերել դաշնակցային բնույթ։ Այդ մասին ասվում է վարչապետ Նիկոլ Փաշինյանի՝ Կիպրոսի նախագահ Նիկոս Անաստասիադեսին Անկախության օրվա կապակցությամբ հղած շնորհավորական ուղերձում:
Ուղերձում նշվում է, որ դարերի խորքից եկող հայ-կիպրական հարաբերությունները բարեկամության բազմաթիվ դրսևորումներ են ունեցել, որոնց հիմքում ընկած են պատմամշակութային առնչությունները, ընդհանուր հոգևոր արժեքներն ու փոխադարձ համակրանքը:
«Վստահ ենք, որ մեր երկու երկրի միջև հաստատված եղբայրական հարաբերություններն ու փոխշահավետ գործակցությունը գալիք տարիներին ևս կարձանագրեն նորանոր ձեռքբերումներ»,-ասվում է ուղերձում:
Ավելի վաղ Կիպրոսի արտաքին գործերի նախարարությունը խորը մտահոգություն էր հայտնել Լեռնային Ղարաբաղի հակամարտության գոտում լարվածության աճի կապակցությամբ եւ դատապարտում է հրադադարի ռեժիմի խախտումն Ադրբեջանի կողմից։
