Ֆրանսիայի նախագահ Էմանուել Մակրոնը հայտարարել է, որ «հստակ տեղեկատվություն» ունեն, որ սիրիացի գրոհայինները Թուրքիայից մասնակցում են Լեռնային Ղարաբաղում ընթացող մարտական գործողություններին։
Մակրոնն այդ մասին հայտարարել է Բրյուսելում, որտեղ ընթանում է ԵՄ գագաթնաժողովը, գրում է ՏԱՍՍ-ը։
«Մենք հստակ տեղեկություններ ունենք, որ սիրիացի գրոհայիները լքել են մարտի դաշտը թուրքական Ղազիանտեպում՝ միանալու համար Ղարաբաղում ընթացող ռազմական գործողություններին։ Սա շատ լուրջ է։ Առաջիկա ժամերին քննարկելու ենք դա գագաթնաժողովում»,- ասել է նա։
Ադրբեջանը սեպտեմբերի 27-ի վաղ առավոտյան Արցախի ուղղությամբ սկսել է օդային և հրթիռային հարձակում՝ թիրախավորելով թե ռազմական օբյեկտներ, թե քաղաքացիական ենթակառուցվածքներ, այդ թվում՝ Ստեփանակերտում։ Հրետակոծություններից վիրավորվել են նաև տեղացի և ֆրանսիացի լրագրողներ։ ՀՀ-ում և Արցախում ռազմական դրություն է հայտարարված։
