Ադրբեջանը դեռևս հավանություն չի տալիս ՌԴ ռազմական դիտորդների տեղակայմանը Լեռնային Ղարաբաղում՝ հրադադարի պահպանման վերահսկման մեխանիզմի կազմում։ Այդ մասին հայտարարել է Արդբեջանի նախագահի օգնական Հիքմեթ Հաջիևը El Mundo-ին հարցազրույցում։

«Ադրբեջանը գործողությունները վարում է ոչ թե այլ երկրի, այլ իր ինքնիշխանության ներքո գտնվող տարածքում։ Եվ մենք չենք կարծում, որ ռուս ռազմական դիտորդների գործուղումն այնտեղ հենց այս պահին տեղին է։ Այս պահին նրանք մեզ հարկավոր չեն»,- ասել է նա, գրում է ՏԱՍՍ-ը։

Հաջիևն ասել է նաև, որ Ադրբեջանի իշխանությունները երբեք չեն բացառել ինքնորոշման տրամադրումը Լեռնային Ղարաբաղին։

«Մենք երբեք չենք բացառել ինքնավարության տրամադրումը ԼՂ-ին Ադրբեջանի սահմաններում, բայց չի կարելի ուժով փոխել միջազգայնորեն ճանաչված սահմանները»,- ասել է նա։

ՌԴ արտգործնախարար Սերգեյ Լավրովն ավելի վաղ հայտարարել է, որ Մոսկվայի կարծիքով՝ Լեռնային Ղարաբաղում պետք է ՌԴ ռազմական դիտորդներ տեղակայվեն շփման գծում, սակայն վերջին խոսքն այստեղ պատկանում է հակամարտության կողմերին։

Ադրբեջանը սեպտեմբերի 27-ի վաղ առավոտյան Արցախի ուղղությամբ սկսել է լայնածավալ հարձակում՝ թիրախավորելով թե ռազմական օբյեկտներ, թե քաղաքացիական ենթակառուցվածքներ երկրի ամբողջ տարածքում։