Ադրբեջանի դատախազության տարածած հաղորդագրությունը, թե, իբր, Հայաստանը թիրախավորել է Բաքու-Նովոռոսիյսկ նավթամուղը, բացարձակ սուտ է։ Այդ մասին ֆեյսբուքայն իր էջում գրել է պաշտպանության նախարարության խոսնակ Շուշան Ստեփանյանը։
«Իսկ ստերն անգամ մեկնաբանության կարիք չունեն»,- գրել է նա։
Ավելի վաղ Ադրբեջանի դատախազությունը հայտարարել էր, թե իբր ՀՀ ԶՈւ-ն փորձել է հրթիռակոծել նավթամուղը, հրթիռը ոչնչացվել է Բաքվի ՀՕՊ համակարգի միջոցով, իսկ բեկորներն ընկել են նավթամուղի հարևանությամբ։
Բաքու- Նովոռոսիյսկ նավթամուղը կասպյան նավթը կոչված է տեղափոխելու ՌԴ սևծովյան տարածաշրջան։Նավթամուղի երկարությունը 1330 կմ է, որից 231-ն անցնում է Ադրբեջանի տարածքով։
Ադրբեջանը սեպտեմբերի 27-ի վաղ առավոտյան Արցախի ուղղությամբ սկսել է լայնածավալ հարձակում՝ թիրախավորելով թե ռազմական օբյեկտներ, թե քաղաքացիական ենթակառուցվածքներ երկրի ամբողջ տարածքում։