Հայաստանի վարչապետ Նիկոլ Փաշինյանը պատերազմի սկզբից ի վեր արդեն երկրորդ անգամ հանդիպում է արտախորհրդարանական ուժերի հետ: Այս մասին, Aysor.am-ի փոխանցմամբ, հայտնել է վարչապետի մամուլի խոսնակ Մանե Գևորգյանը՝ նշելով, որ հանդիպման կազմը նույնն է, ինչ նախորդ անգամ։

Հոկտեմբերի 12-ին Նիկոլ Փաշինյանը իր նախաձեռնությամբ կառավարության շենքում հանդիպել էր մեկ տասնյակ արտախորհրդարանական ուժերի ներկայացուցիչների հետ, այդ թվում՝ ՀՀԿ-ի, ՀՅԴ-ի, ՀԱԿ-ի:

Ավելի վաղ 13 կուսակցություն համատեղ դիմել էին ՀՀ կառավարությանը և պահանջել հրատապ կարգով ստեղծել ռազմաքաղաքական հարցերի օպերատիվ կառավարման շտաբ-պետական հատուկ մարմին՝ օժտելով նրան որոշումներ ընդունելու, օպերատիվ գործողություններ ծրագրելու և համակարգելու իրավասություններով: Ինչպես նաև հայրենքի պաշտպանությունն արդյունավետ կազմակերպելու համար ներգրավել Հայաստանի և Արցախի նախկին և գործող նախագահներին, վարչապետներին, պաշտպանության և արտաքին գործերի նախարարներին, ռազմական և քաղաքական փարձառություն ունեցող այլ անձանց:

Ադրբեջանը սեպտեմբերի 27-ի վաղ առավոտյան Արցախի ուղղությամբ սկսել է օդային և հրթիռային հարձակում՝ թիրախավորելով թե ռազմական օբյեկտներ, թե քաղաքացիական ենթակառուցվածքներ, այդ թվում՝ Ստեփանակերտում։ Հրետակոծություններից վիրավորվել են նաև տեղացի և ֆրանսիացի լրագրողներ։ ՀՀ-ում և Արցախում ռազմական դրություն է հայտարարված։