20 հոկտեմբերի 2020 - 11:02 AMT
ՄԻՊ․ Միջազգային կառույցները պետք է արձանագրեն եղելությունը՝ ֆիզիկապես լինելով Արցախում

Ադրբեջանի զինված ուժերի զանգվածային ավերածություններն ու վայրագություններն Արցախում հենց այն բանի հետևանք են, որ տարիներ շարունակ միջազգային ու հատկապես մարդու իրավունքների կառույցները հրաժարվել են Արցախ այցերից՝ չնայած բազմաթիվ կոչերին, հրավերներին ու զգուշացումներին: Այդ մասին հայտարարել է ՀՀ ՄԻՊ Արման Թաթոյանը՝ հավելելով, որ նրանք եղելությունը պետք է արձանագրեն ֆիզիկապես լինելով Արցախում, պետք է ամեն ինչ իրենց աչքով անմիջականորեն տեսնեն ու ընկալեն:

«Ժամանակն է ապացուցելու, որ ամենաբարձր մակարդակով հայտարարվող՝ «Որևէ մեկը չպետք է դուրս լինի եզրագծից ու որևէ իրավունք չպետք է անտեսվի» սկզբունքը ոչ թե գեղեցիկ արտահայտություն է ու պատրանք, այլ իրական կյանքում իրական մարդուն պաշտպանող սկզբունք:

Ժամանակն է ապացուցելու, որ երեխայի երջանիկ մանկության իրավունքը, իր երեխային խաղաղ երկնքի տակ դաստիարակելու մոր իրավունքը կամ կյանքն արժանապատիվ վայելելու տատիկ-պապիկների իրավունքը դեռ որևէ մեկը չի վերացրել. որևէ քաղաքական պատճառ չի կարող ազդել մարդու իրավունքների պաշտպանության վրա և վերջ», - նշել է Թաթոյանը։

Արցախցի կանայք հոկտեմբերի 19-ին ՄԱԿ գրասենյակի դիմաց բողոքի ակցիա են իրականացրել, նրանք ՄԱԿ հայաստանյան գրասենյակի աշխատակիցներից ու ներկայացուցչից պահանջում են Լեռնային Ղարաբաղի հարցով առարկայական դիրքորոշում արտահայտել և այցելել Ստեփանակերտ, տեղում ծանոթանալ իրավիճակին։

Ադրբեջանը սեպտեմբերի 27-ի վաղ առավոտյան Արցախի ուղղությամբ սկսել է լայնածավալ հարձակում՝ թիրախավորելով թե ռազմական օբյեկտներ, թե քաղաքացիական ենթակառուցվածքներ երկրի ամբողջ տարածքում։