Լեռնային Ղարաբաղում Ադրբեջանի սանձազերծած պատերազմում ահաբեկիչների ներկայությունը սպառնալիք է, և տարածաշրջանային երկրները պետք է ավելի լուրջ մոտենան այդ խնդրին, հայտարարել է վարչապետ Նիկոլ Փաշինյանը՝ «Իրան» օրաթերթին հարցազրույցում:
Վարչապետը նշել է՝ միջազգային մակարդակով հաստատվել է, որ ռազմական գործողություններին մասնակցելու համար Սիրիայից վարձկան ահաբեկիչներ են տեղափոխվում տարածաշրջան Թուրքիայի միջոցով։ Փաշինյանի խոսքով՝ Թուրքիայի՝ տարածաշրջան բերած ահաբեկիչները լրջագույն վտանգ են ստեղծում։
«Ցավոք, տարածաշրջանային երկրներն այս իրողությանը չեն դրսևորել լուրջ հակազդեցություն: Կասկածից վեր է, որ արտաքին ահաբեկիչների ներկայությունը ստեղծելու է այնպիսի սպառնալիքներ, որոնց տարածաշրջանային հետևանքներն ապագայում են երևալու: Տարածաշրջանային երկրները պետք է ավելի լուրջ մոտենան այս խնդրին»,- նշել է Փաշինյանը:
Թուրքիան ռազմական ակտիվ ներկայություն ունի Արցախի դեմ սանձազերծված պատերազմում․ թուրքական զորքերն աջակցություն են ցույց տալիս Ադրբեջանին, իսկ այդ երկիրը Լիբիայից ու Սիրիայից վարձկաններ է բերել՝ ԼՂ-ում կռվելու։ Ավելի վաղ հայկական կողմը հրապարակել էր երկու վարձկանի խոսակցության ձայանգրությունը, որտեղ նրանք քննարկում էին նաև Իրանի տարածք անցնելու հնարավորությունը։
Ադրբեջանը սեպտեմբերի 27-ի վաղ առավոտյան Արցախի ուղղությամբ սկսել է օդային և հրթիռային հարձակում՝ թիրախավորելով թե ռազմական օբյեկտներ, թե քաղաքացիական ենթակառուցվածքներ, այդ թվում՝ Ստեփանակերտում։ ՀՀ-ում և Արցախում ռազմական դրություն է հայտարարված։
