«Սմերչ» համազարկային կրակի ռեակտիվ համակարգով հրետակոծվել են Շուշին և Ստեփանակերտը։ Այդ մասին հայտարարել է Արցախի արտակարգ իրավիճակների նախարարությունը։
«Խաղաղ բնակչության շրջանում կա մեկ զոհ և երկու վիրավոր»,- ասվում է Շուշիի մասին գրառման մեջ։
«Սմերչից» մեկ անգամ Ստեփանակերտին հասցված հարվածից տուժածներ չկան։
Հոկտեմբերի 28-ի առավոտվա դրությամբ տեղային նշանակության մարտեր են ընթանում ճակատային գծի որոշ ուղղություններում: ՊԲ ստորաբաժանումները շարունակում են հակառակորդի դիվերսիոն խմբերի ոչնչացման գործողությունները:
Ադրբեջանը սեպտեմբերի 27-ի վաղ առավոտյան Արցախի ուղղությամբ սկսել է օդային և հրթիռային հարձակում՝ թիրախավորելով թե ռազմական օբյեկտներ, թե քաղաքացիական ենթակառուցվածքներ, այդ թվում՝ Ստեփանակերտում։ ՀՀ-ում և Արցախում ռազմական դրություն է հայտարարված։
