2017-ի հոկտեմբերին Հայաստանում անցկացված Կյոկուշին կարատեի Հայաստանի 12-րդ բաց առաջնությանը ոսկե մեդալ նվաճած իրանցի մարզիկ Ահմադ Բաղերիփուրը որոշել է իր ոսկե մեդալը, որպես հարգանքի տուրք, նվիրել Արցախյան նոր պատերազմի ժամանակ զոհված հայազգի մարզիկ Արթուր Սուքիասյանի ընտանիքին։ Այդ մասին տեղեկացնում է Իրանում ՀՀ դեսպանությունը։

Սուքիասյանը և Բաղերիփուրը միասին հանդես են եկել մի շարք առաջնություններում և ունեցել են բարեկամական հարաբերություններ։

Հունվարի 13-ին իրանցի մարզիկն ԻԻՀ-ում ՀՀ դեսպանության երրորդ քարտուղար Գոռ Շահվերդյանին է հանձնել իր ոսկե մեդալը՝ Սուքիասյանի ընտանիքին փոխանցելու նպատակով։

Արցախի դեմ սանձազերծված թուրք-ադրբեջանական պատերազմի արդյունքում հայկական կողմը հազարավոր զոհեր ունեցավ՝ նրանց վերջնական թիվը դեռ չի հրապարակվել։