Հայաստանը կորոնավիրուսի դեմ պատվաստանյութ կգնի բրիտանա-շվեդական AstraZeneca ընկերությունից, փոխանցում են առողջապահության նախարարությունից։

Պատվաստանյութի գնման հնարավորությունը քննարկվել է «Իմունականխարգելման հարցերով հանրապետական խորհրդատվական փորձագիտական հանձնաժողովի» նիստում՝ հաշվի առնելով գինը և թողարկման ամսաթիվը՝ 2021-ի մարտին։

«Որոշվել է չմերժել AstraZeneca ընկերության պատվաստանյութի ձեռքբերումը` նախատեսված բնակչության 3%-ի համար՝ հաշվի առնելով հնարավորինս վաղ ժամկետում հասանելիությունը և արժեքի մատչելիությունը: 1-ին փուլում կպատվաստվեն տարեցների խնամքի կենտրոնների բնակիչները և աշխատակիցները, բուժաշխատողները, սոցիալական խնամքի կենտրոնների աշխատակիցները, 65 տարեկան և բարձր տարիքի անձինք, 16-ից 64 տարեկան քրոնիկ հիվանդները»,-հայտնել են ԱՆ-ից։

Նշվել է, որ համաճարակային իրավիճակից և պատվաստանյութի առկայությունից ելնելով՝ հաջորդ փուլում կպատվաստվեն դասախոսները, ուսուցիչները, արտակարգ իրավիճակների նախարարության աշխատակիցները, զինծառայողները, արդարադատության ոլորտի աշխատակիցները, հանրային տրանսպորտի աշխատակիցները, պետական ծառայողները:

Ավելի վաղ ԱՆ-ից հայտնել էին, որ բանակցություններ են ընթանում տարբեր ուղղություններով՝ այդ թվում ռուսական Sputnik V-ի և ամերիկյան Moderna-ի պատվաստանյութը ձեռք բերելու համար։ AstraZeneca-ի պատվաստանյութի արդյունավետությունը միջինում գնահատվում է 70%։ Պատվաստանյութի արդյունավետության մակարդակը դեղաչափերից մեկի համար կազմել է 90%։