Արտաքին գործերի նախարարությունը շրջանառության մեջ է դրել նախագիծ, որով առաջարկվում է հնարավորություն տալ Լիբանանում, Սիրիայում և Իրաքում ՀՀ քաղաքացու անձնագիր ստանալ ՀՀ դիվներկայացուցչություններում և հյուպատոսարաններում։
Նման հնարավորություն գործում էր մինչև 2020թ․։ Այս առաջարկով նախատեսվում է երկարացնել ժամկետը։
Ըստ նախագծի հիմնավորման՝ փոփոխությունն իրականացվում է՝ հաշվի առնելով նշված պետություններում շարունակվող լարվածությունը՝ տեղական նահանգների և շրջանների միջև ճանապարհների ոչ անվտանգ լինելը, ինչը կարող է դժվարացնել այդ երկրներում բնակվող հայերի՝ Հայաստան գալը և ՀՀ քաղաքացու անձնագիր ստանալը։
Ավելի վաղ կառավարությունն արդեն իսկ փոփոխություն կատարել էր 2012-ի որոշման մեջ ու նշված երկրներում գտնվող ՀՀ քաղաքացիներին հնարավորություն տվել ներկայացուցչություններում ստանալ անձնագրեր, սակայն դրա գործողության ժամկետը մինչև 2020 թվականն էր։