Սաուդյան Արաբիան պաշտոնապես հաստատել է, որ բանակցություններ է սկսել Իրանի հետ։ Երկրները խզել էին հարաբերությունները 5 տարի առաջ։
Երկու երկրի միջև բազմամյա պայքար է գնում տարածաշրջանում առաջատարի դիրքի համար։
Սաուդյան Արաբիայում ասել են, որ հանդիպումը միտված էր լարվածության նվազեցմանը, բայց միանգամից զգուշացրել, որ «դեռ չափազանց վաղ է վերջնական եզրակացություններ անելու համար»։
Այդ հստակեցումը, հավանաբար, վերաբերում էր մամուլում հայտնված այն ենթադրություններին, որ շուտով կարելի է ակնկալել երկու երկրի միջև դիվանագիտական հարաբերությունների վերականգնում, գրում է BBC-ն։
Բանակցություններում որպես միջնորդ էր հանդես եկել Իրաքը, այդ երկու երկրի բարդ հարաբերությունների պատմության մեջ ոչ առաջին անգամ։ Հանդիպումը տեղի է ունեցել Բաղդադում։
Ըստ Financial Times-ի աղբյուրների` քննարկումների ժամանակ խոսք է գնացել «Անսար Ալլահ» շարժման մասին, որը բաղկացած է շիա հուսիթների ցեղից և որին սատարում է Թեհրանը։
Ակնկալվում է, որ բանակցությունների ևս մեկ փուլ տեղի կունենա առաջիկայում։