Մարդու իրավունքների եվրոպական դատարանը (ՄԻԵԴ) հրապարակել է հերթական վճիռն ընդդեմ Ադրբեջանի՝ արձանագրելով, որ 2009-2011 թթ. Ադրբեջանը խոշտանգել և ազատությունից ապօրինիզրկել է Արթուր Բադալյանին, որը մոլորվել էր և հայտնվել Ադրբեջանի տարածքում: Այդ մասին ֆեյսբուքյան իր էջում տեղեկացրել է Մարդու իրավունքների եվրոպական դատարանում ՀՀ ներկայացուցչի գրասենյակի ղեկավար Լիպարիտ Դրմեյանը։

«Եվրոպական դատարանը Ադրբեջանին պարտավորեցրել է Բադալյանին վճարել 30,000 եվրո, որպես ոչ նյութական վնասի հատուցում:

Հատկանշական է, որ այժմ էլ Ադրբեջանը շարունակում է խախտել իր տիրապետության տակ ներքո գտնվող հայ գերիների և քաղաքացիական անձանց իրավունքները»,- ասվում է գրառման մեջ։

Արթուր Բադալյանը գերեվարվել էր, երբ գնացել էր Ադրբեջանի սահմանին մոտ գտնվող Նավուր գյուղ` անտառում սունկ հավաքելու։ Նա հայկական կողմին է վերադարձվել 2011 թ. մարտի 17-ին ԿԽՄԿ միջնորդությամբ գերիների փոխանակման շրջանակում։