Առողջապահության նախարար Անահիտ Ավանեսյանը, կառավարության նիստում անդրադառնալով կորոնավիրուսի հետ կապված իրավիճակին, տեղեկացրել է, որ իրականացվել է 190,036 պատվաստում, որից միայն օգոստոսի 5-ին՝ 6188։
Նա նշել է նաև, որ հուլիսի 15-ից մինչև օգոստոսի 4-ը 58,108 անձ է պատվաստվել, որոնցից 2096-ը օտարերկրացի։ Նախարարը հավելել է, որ պատվաստվածների մեծամասնությունը, այնուամենայնիվ, տեղաբնակներն են։
Ավանեսյանը հայտնել է նաև, թե ինչպես է օգտագործվելու կորոնավիրուսի դեմ պայքարի և առողջապահական համակարգի բարելավման նպատակով Եվրասիական զարգացման բանկի ՀՀ-ին տրամադրվելիք $3 մլն դրամաշնորհը։
Նա նշել է, որ ամբողջապես կվերակառուցվեն և կվերազինվեն Հիվանդությունների վերահսկման և կանխարգելման ազգային կենտրոնի Արմավիրի և Արարատի մասնաճյուղերը։ Այդ գումարով նաև նոր ինֆեկցիոն մասնաշենք կկառուցվի Վանաձորի ԲԿ-ում։
Ավելի վաղ հայտնի դարձավ, որ Հայաստան է ներկրվել կորոնավիրուսային հիվանդության (Covid-19) դեմ AstraZeneca /Vakszevria պատվաստանյութի հերթական խմբաքանակը՝ 50,400 դեղաչափ: Պատվաստանյութը ձեռք է բերվել Covax Facility նախաձեռնության շրջանակում:
