Ազգային ժողովը 30 կողմ և 0 դեմ ձայներով մերժել է ԱԺ հանձնաժողովն անվանափոխելու և Արցախ բառն ավելացնելու նախագիծը։ Իշխող «Քաղաքացիական պայմանագիր» խմբակցությունը չի մասնակցել քվեարկությանը։
«Հայաստան» խմբակցության ներկայացրած նախագծով առաջարկվում էր Արտաքին հարաբերությունների մշտական հանձնաժողովը վերանվանել «Արտաքին հարաբերությունների և Արցախի հարցերի մշտական հանձնաժողով»:
Մինչ քվեարկությունը Պետական-իրավական հարցերի մշտական հանձնաժողովի նախագահ Վլադիմիր Վարդանյանն ասել էր, որ Հայաստանի և Արցախի միջև ստեղծված միջխորհրդարանական հանձնաժողովի իրավասության մեջ արդեն ընդգրկված են առաջարկվող գործառույթները և նման հանձնաժողով ստեղծելու անհրաժեշտություն չկա:
«Հայաստան» խմբակցության պատգամավոր Արմեն Ռուստամյանն ասել է, որ ողջամիտ կասկած է առաջանում, որ ՔՊ-ն ցանկանում է Արցախից վերջնականապես հրաժարվել։ Նա նշել է, որ ՀՀ և Արցախի միջխորհրդարանական հանձնաժողովի ոչ մի նիստ չի անցկացվել։
Ավելի վաղ Ազգային ժողովի պետական-իրավական հարցերի մշտական հանձնաժողովն էր մերժել «Հայաստան» խմբակցության նախագիծը, որով առաջարկվում էր անվանափոխել ԱԺ արտաքին հարաբերությունների հարցերի մշտական հանձնաժողովը՝ ավելացնելով Արցախ բառը։