Հայաստանն ու Հնդկաստանը պետք է ջանքեր գործադրեն պաշտպանական ոլորտում համագործակցությունը նոր մակարդակ տեղափոխելու համար: Այդ մասին Հնդկաստանի արտգործնախարար Սուբրամանյամ Ջայշանկարի հետ համատեղ ասուլիսի ժամանակ ասել է ՀՀ արտաքին քաղաքական գերատեսչության ղեկավար Արարատ Միրզոյանը, գրում է «Ազատություն» ռադիոկայանը։
ՀՀ ԱԳ նախարարը հայտարարել է նաև, որ Հնդկաստանը կարող է նպաստել Հարավային Կովկասում կայունությանը և խաղաղությանը։
«Հնդկաստանի հետ հարաբերությունների հետագա ընդլայնումը Հայաստանի կառավարության առաջնահերթություններից է», - ասել է նախարարը՝ նշելով, թե պլանավորել են անցկացնել երկկողմ քաղաքական խորհրդակցություններ և միջկառավարական հանձնաժողովի հերթական համատեղ նիստը, տեղեկացնում է Aysor.am-ը։
Արարատ Միրզոյանն ու Սուբրամանյամ Ջայշանկարն առանձնազրույց են ունեցել, որին հաջորդել է ընդլայնված կազմով հանդիպումը։
Հնդկաստանի արտաքին գործերի նախարար Սուբրամանյամ Ջայշանկարը հայաստանում է պաշտոնական այցով։
