Հայաստանում Ռուս ուղղափառ եկեղեցու եկեղեցական համալիր կկառուցվի՝ մայր տաճարով։ Այդ մասին «Ռոսիա 24» հեռուստաալիքի եթերում հայտարարել է ՌՈւԵ նորաստեղծ Երևանի և Հայոց թեմի նորանշանակ առաջնորդ, Երևանի և Հայոց թեմակալ, արքեպիսկոպոս Լեոնիդը՝ նշելով, որ դա հեռանկարային խնդիր է նոր թեմի համար։
«Հեռանկարի խնդիրներն են Ռուս ուղղափառ եկեղեցու եկեղեցական համալիրի կառուցումը՝ մայր տաճարով, ինչպես նաև ՀՀ-ուm մեր հավատացյալների հոգևոր աջակցությունը»,-ասել է նա։
Արքեպիսկոպոսը նշել է, որ ՌՈւԵ-ն հիանալի հարաբերություններ ունի Հայ Առաքելական եկեղեցու հետ։
«Մենք աջակցություն ենք զգում և ղեկավարության, և հավատացյալների կողմից։ ՀՀ տարածքում կառուցվում են ուղղափառ եկեղեցիներ՝ ոչ մի խնդիր չեմ տեսնում միջեկեղեցական հարաբերությունների առումով»,-ասել է նա։
Ավելի վաղ հայտնի դարձավ, որ Ռուս ուղղափառ եկեղեցու Սինոդը որոշել է թեմ հիմնել Հայաստանի տարածքում։ Կազմավորվող ՌՈւԵ Երևանի և Հայոց թեմի առաջնորդը կկրի «Երևանի և Հայոց թեմակալի» տիտղոսը։ Նստավայրը կլինի Երևանում։
Մոսկվայի պատրիարքության հանրության և ԶԼՄ-ների հետ կապի բաժնի նախագահ Վլադիմիր Լեգոյդան նշել է, որ այդ որոշումը «եղբայրական երկխոսության ոգով» քննարկվել է Ամենայն Հայոց կաթողիկոս Գարգեգին Երկրորդի հետ Համայն Ռուսիո և Մոսկվայի պատրիարք Կիրիլի հանդիպմանը։
