Սյունիքի մարզի Կապան քաղաքի Փելա սարի «Լկատր» կոչվող բարձունքն ամբողջովին անցել է Ադրբեջանի վերահսկողության տակ։ Այդ մասին հայտնել է Կապանի համայնքապետ Գևորգ Փարսյանը, տեղեկացնում է Factor.am-ը։
Նրա խոսքով՝ երկու օր առաջ ռուս սահմանապահներն իջեցվել են այդ դիրքից:
«Մեզ համար սարի այդ ճանապարհը միջդիրքային ուղի էր ծառայում, գյուղացիներն օգտագործում էին անտառ գնալու և վառելափայտ գտնելու նպատակով։ Տարիներ առաջ այդտեղ ՀՕՊ զորամաս է եղել, հետո ժամանակի ընթացքում այդ ճանապարհահատվածը սկսեցինք օգտագործել և՛ մենք, և՛ ադրբեջանական կողմը։ Հիմա լրիվ իրենցն է, փակել են մեզ համար»,- նշել է համայնքապետը։
Թե երբ և ում միջև է այսպիսի պայմանավորվածություն ձեռք բերվել, Փարսյանը տեղյակ չէ։
Մինչդեռ Սյունիքի մարզպետ Մելիքսեթ Պողոսյանը ժխտել է այդ լուրը։
«Նման բան չկա, սուտ բաներ են»,-ասել է նա, սակայն, հավելյալ տեղեկություններ չի հայտնել։
Ճշտող հարցին՝ իսկ տեղեկությունը փորձե՞լ են հստակեցնել, մարզպետը բացասական պատասխան է տվել։
Կարդացեք նաև․ ԱԱԾ-ն հերքել է Փելա սար տարածքն Ադրբեջանի վերահսկողության տակ անցնելու լուրերը