Երևանի Դավիթաշեն 1-ին թաղամաս 27/2 հասցեում գտնվող 172 քառակուսի մետր մակերեսով ոչ բնակելի տարածքն անհատույց օգտագործման իրավունքով կհանձնվի Երկրապահ կամավորականների միությանը։ Հարցն ընդգրկված էր կառավարության նիստի չզեկուցվող հարցերի թվում։
Տարածքը տրամադրվել է 10 տարի ժամկետով։
Հիմնավորման մեջ նշվում է, որ Երևանի քաղաքապետարանի և Կազմակերպության միջև 03.07.2020թ. կնքված պայմանագրով տարածքը 5 տարի ժամկետով հատկացվել էր ԵԿՄ-ին, որը Երևանի քաղաքապետարանը ցանկանում է վաղաժամկետ լուծել, ինչը կբերի ԵԿՄ-ի բնականոն աշխատանքների խանգարման։
Ըստ կառավարության որոշման հիմնավորման՝ ԵԿՄ-ին անհատույց օգտագործման իրավունքով տարածքը տրամադրելը բխում է Հայաստանի վերափոխման ռազմավարության պետական գույքի արդյունավետ կառավարման դրույթից։
Հիմք ընդունելով այն փաստը, որ ԵԿՄ-ն օժանդակում է ՀՀ զինված ուժերի հզորացմանը և պատանիների ու երիտասարդների ռազմահայրենասիրական դաստիարակությանը, նպաստում է հաշմանդամ, զոհված և անհայտ կորած ազատամարտիկների ընտանիքների սոցիալ-կենցաղային պայմանների բարելավմանը՝ ՏԿԵՆ պետական գույքի կառավարման կոմիտեի կողմից մշակվել է «Անհատույց օգտագործման իրավունքով տարածք հանձնելու մասին» ՀՀ կառավարության որոշման նախագիծը, որով տարածքը տրամադրվում է կազմակերպությանը 10 տարի ժամկետով անհատույց օգտագործման իրավունքով։
Նշվում է, որ բյուջեներում ծախսերի և եկամուտների ավելացում կամ նվազեցում չի նախատեսվում։