Բուդապեշտում մեկնարկած ազատ ոճի ըմբշամարտի Եվրոպայի առաջնությունում Հայաստանի հավաքականն առայժմ 2 մեդալ է նվաճել՝ 1 արծաթ և 1 բրոնզ։

Արման Անդրեասյանը 70 կգ քաշային կարգում չեմպիոնական տիտղոսի համար գոտեմարտել է վրացի Զուրաբի Յակոբիշվիլիի հետ և համառ պայքարում զիջել միավորների 1:2 տարբերությամբ՝ բավարարվելով արծաթե մեդալով, հայտնում է ԿԳՄՍ նախարարությունը։

Բրոնզե մեդալ է նվաճել 57 կգ քաշային Մանվել Խնձրցյանը՝ պարտության մատնելով գերմանացի Նիկլաս Ստեչելին:

79 կգ քաշային Արման Ավագյանը, անհաջողության է մատնվել Վրաստանի ներկայացուցիչ Վլադիմերի Գամկրելիձեի հետ գոտեմարտում:

Բրոնզե մեդալի համար կպայքարի նաև Հրայր Ալիխանյանը (74 կգ): Ալիխանյանը կիսաեզրափակչում 1:7 հաշվով զիջել է աշխարհի և Եվրոպայի բազմակի չեմպիոն, Ռիո-2016-ի մեդալակիր, Իտալիան ներկայացնող Ֆրանկ Չամիզոյին և կպայքարի երրորդ տեղի համար:

Հայաստանի ներկայացուցիչներից փայլուն է հանդես եկել 2019 թ. Եվրոպայի չեմպիոն Արսեն Հարությունյանը: 61 կգ քաշայինների կիսաեզրափակչում 0:6 հաշվով պարտվելիս Հարությունյանը կարողացել է բեկել գոտեմարտի ընթացքն ու 13:8 հաշվով հաղթելով Լեհաստանի ներկայացուցչին՝ դուրս է եկել եզրափակիչ: Ոսկե մեդալի համար գոտեմարտում Հարությունյանը կպայքարի Թուրքիայի ներկայացուցիչ Սուլեյման Աթլըի հետ: