Վճարովի ավտոկայանատեղերի «կարմիր գծերի» գույնը կփոխվի, կենտրոնում գտնվող կայանատեղիներն ավելի թանկ կլինեն։ Կառավարությունը հաստատել է «Ավտոտրանսպորտային միջոցների կայանատեղերի տեղական վճարի և վարչական վարույթի առանձնահատկությունների մասին» օրենքում փոփոխություն կատարելու մասին» ՀՀ օրենքի նախագիծը:
Կայանատեղիներում վճարման դրույքաչափերը կսահմանվեն ըստ գոտիականության։
Նախագծով առաջարկվում է ավտոկայանատեղերն ըստ նշանակության տարբերակելու համար դրանք նշել տարբեր գույներով՝ հաշմանդամություն ունեցող վարորդների համար` մի գույնով, ծառայողական մեքենաների համար` այլ գույնով և այլն։ Առաջարկվում է կարմիր գույնը վերապահել միայն հաշմանդամություն ունեցողների համար։
Նախագծի ընդունման արդյունքում կհեշտացվի համայնքային վճարովի ավտոկայանատեղերի տարբերակիչ գետնանշումների գույնի և ձևի վերաբերյալ փոփոխությունների իրականացման գործընթացը։