Հանրային հեռուստաընկերությունը իրավական գործընթաց է սկսել՝ պարզելու «Կյանք ու կռիվ» ֆիլմի հեղինակային իրավունքներն այլ իրավատիրոջ փոխանցելու հանգամանքները։

Հանրային հեռուստաընկերությունը, արձագանքելով «Կյանք ու կռիվ» ֆիլմի վերաբերյալ հարցումներին, թե ինչու ֆիլմի հեղինակային իրավունքներն ունենալով հանդերձ՝ այն չի ցուցադրում, հայտնել է, որ, թեև ֆիլմը նկարահանվել է Հանրային հեռուստաընկերության պատվերով և միջոցներով, և, ըստ տրամաբանության՝ հեղինակային իրավունքները պետք է պատկանեին Հանրայինին, փաստացի, տնօրինվում են այլ ընկերության կողմից:

«Միևնույն ժամանակ հայտնում ենք, որ Հանրային հեռուստաընկերությունն արդեն իրավական գործընթաց է սկսել՝ պարզելու ֆիլմի հեղինակային իրավունքներն այլ իրավատիրոջ փոխանցելու հանգամանքները, վերականգնելու իր իրավունքները, ինչպես նաև գնահատելու և փոխհատուցելու Ընկերությանը հասցված վնասը:

Հանրայինն այս խնդրի առնչությամբ դիմում է պատրաստվում ուղղել ՀՀ պետական վերահսկողական ծառայություն»,- ասված է Հանրային հեռուստաընկերության հայտարարության մեջ:

«Կյանք ու կռիվը» ռեժիսոր Մհեր Մկրտչյանի 2016թվականին նկարահանած ֆիլմն է մարդկային արժեքների, ընկերության, սիրո և հայրենասիրության մասին՝ նվիրված Արցախիհերոսներին և ՀՀ անկախության 25-ամյակին։