Ադրբեջանն ու Սերբիան կգործակցեն ռազմարդյունաբերության և էներգետիկ ոլորտներում։ Այդ մասին ասվել է Ադրբեջանի նախագահ Իլհամ Ալիևի և Սերբիայի նախագահ Ալեքսանդր Վուչիչի հանդիպմանը, որն այցով գտնվում է Ադրբեջանում։
Ալիևը հանդիպումից հետո ասել է, որ ակնկալում է, որ երկու երկրները գործնական քայլեր կձեռնարկեն ռազմարդյունաբերության ոլորտում գործակցության ուղղությամբ, գրում է Interfax.az-ը։
«Երկու երկրները ներուժ ունեն այդ ոլորտում և ակնկալվում է, որ գործնական քայլեր կձեռնարկվեն այդ ներուժը կյանքի կոչելու համար»,-ասել է նա։
Ալիևը նաև ասել է, որ 2023-ից քայլեր կձեռնարկվեն Սերբիա էլեկտրաէներգիա արտահանելու ուղղությամբ։
Նա հիշեցրել է, որ վերջերս համաձայնագիր է ստորագրվել Ադրբեջանից Եվրոպա էլեկտրաէներգիայի արտահանման համար։
«Կաբելը, որն անցկացվելու է Սև ծովի հատակով, կհաստատի, որ Ադրբեջանը կարևոր մատակարար է Եվրոպայի համար այդ ոլորտում»,-ասել է նա։
