Ազգային ժողովի նախագահ Ալեն Սիմոնյանը Factor TV-ին հարցազրույցում պատասխանելով հարցին, թե ինչու ՀՀ իշխանությունը չարձագանքեց ՌԴ ԱԳ նախարար Սերգեյ Լավրովի հայտարարությանը, չդատապարտեց այն, ասել է, թե չի կարելի ասել, որ երբ մեկը մի բան ասում է, պետք է պարտադիր արձագանքել, բազմիցս դրան անդրադարձել են։

ՌԴ ԱԳ նախարար Սերգեյ Լավրովը լրագրող Դմիտրի Կիսելյովին հարցազրույցում հայտարարել է, թե «ՀՀ-ն երկար տարիներ օկուպացրել է Ադրբեջանի 7 շրջանը, իսկ հիմա Ադրբեջանը դրանք վերադարձրել է»։

«Լավրովը չխոսեց Խովաևի առաջարկի մասին, որին ՀՀ տվել է իր համաձայնությունը, բայց այն չի իրագործվել է՝ ինչու չի իրագործվել և ուր է այդ փաստաթուղթը, դա է կարևոր»,-ասել է նա։

Իգոր Խովաևը ԵԱՀԿ Մինսկի խմբի ռուսաստանցի համանախագահ, ՌԴ արտաքին գործերի նախարարի հատուկ ներկայացուցիչն էր։

Սիմոնյանը, խոսելով Լավրովի՝ ՀԱՊԿ խաղաղապահներին ՀՀ ուղարկելու պատրաստակամության մասին, նշել է, որ ՀԱՊԿ-ը որևէ կոնկրետ արձագանք չտվեց, գործընկերներն այդպես էլ քաղաքական գնահատական չեն տվել ադրբեջանական ագրեսիային։

Պատասխանելով հարցին, թե հնարավոր է արդյոք, որ ՀՀ-ն սառեցնի իր անդամակցությունը ՀԱՊԿ-ում՝ Սիմոնյանն ասել է․ «Երևանը գործում է ըստ անհրաժեշտության, ըստ հողի վրա իրադարձությունների, վստահեցնում եմ, որ ՀԱՊԿ-ի նկատմամբ մեր չբավարարված լինելը մեզ չի սահմափակում ՀՀ անվտանգությունն ամեն ձևով կազմակերպելու հարցում»։

Լավրովը նաև ասել է․ «Երբ Հայաստանն ու Ադրբեջանը շարունակում են ուղիներ փնտրել Կովկասում իրավիճակի կայունացման համար, ՀԱՊԿ-ը նույնպես պատրաստ է օգնելու: Անցյալ տարվա սեպտեմբերին բռնությունների աճից հետո երկու կողմից այնտեղ մոտ 300 մարդ զոհվեց, մենք անմիջապես Հայաստանից հարցում ստացանք ու գլխավոր քարտուղարը, ՀԱՊԿ-ը փորձագետների հատուկ առաքելությամբ գնաց սահման և բերեց ՀԱՊԿ-ի տեղակայման պլան Հայաստանի այն հատվածում, որը սահմանակից է Ադրբեջանին»։