Սյունիքի մարզի Տեղ գյուղում ադրբեջանական սադրանքի հետևանքով վիրավորված, ծայրահեղ ծանր վիճակում գտնվող զինծառայողի մոտ դրական տեղաշարժ կա։ Այդ մասին լրագրողների հետ զրույցում ասել է առողջապահության նախարար Անահիտ Ավանեսյանը։

«Ծայրահեղ ծանր վիճակում գտնվող զինծառայողի մոտ ունենք որոշակի դրական տեղաշարժ, կայունացում։ Հուսով ենք, որ դրական ընթացք կունենա ապաքինումը»,- նշել է Ավանեսյանը, հայտնում է Factor.am-ը։

Նախարարի խոսքով մյուս վիրավոր զինծառայողների մասով նույնպես կա դրական տեղաշարժ։ Ավանեսյանը հավելել է, որ անձամբ է այցելել վիրավոր զինծառայողներին, որոնցից 2–ը գտնվում են Սիսիանում, 4-ը Երևանում, և շուտափույթ ապաքինում մաղթել։

Ապրիլի 11-ին՝ ժամը 16:00-ի սահմաններում, Ադրբեջանի ԶՈւ ստորաբաժանումները կրակ են բացել Տեղ համայնքի հատվածում ինժեներական աշխատանքներ իրականացնող ՀՀ ԶՈւ զինծառայողների ուղղությամբ: Հայկական կողմը դիմել է պատասխան գործողությունների: Հայկական կողմն ունի 4 զոհ և 6 վիրավոր։ Վիրավորների թվում է նաև Հատուկ բանակային կորպուսի հրամանատար Արմեն Գյոզալյանը։