ՆԱՏՕ-ի նախկին գլխավոր քարտուղար Անդերս Ֆոգ Ռասմուսենը, անդրադառնալով Լաչինի միջանցքում Ադրբեջանի կողմից հսկիչ անցակետի տեղադրմանը, ֆեյսբուքյան իր էջում գրել է, որ եթե Բաքուն շարունակի անտեսել իր միջազգային պարտավորությունները և Միջազգային դատարանի պարտադիր ուժ ունեցող դատական վճիռը, ապա պետք է լինեն քաղաքական և տնտեսական հետևանքներ:

Նա նշել է, որ տագնապալի զարգացումներ են Լաչինի միջանցքում, որը միակ ճանապարհն է, որ կապում է Լեռնային Ղարաբաղը Հայաստանի հետ։

«Ադրբեջանի կառավարության գործողությունները մեծապես նպաստում են էսկալացիային։ Կարծես, դա կոչված է բարդացնելու ԼՂ հայ բնակչության կյանքը և ավելացնում է էթնիկ զտման վտանգը։

Եվրամիությունը և ամբողջ միջազգային հանրությունը պետք է դրդի Ադրբեջանին, որպեսզի նա թույլ տա մարդկանց ազատ երթևեկությունը և բեռների տեղաշարժը միջանցքով։ Միջազգային հանրությունը նաև պետք է հասկանցի Ադրբեջանի ղեկավարներին, որ եթե Բաքուն շարունակի անտեսել իր միջազգային պարտավորությունները և Միջազգային դատարանի պարտադիր ուժ ունեցող դատական վճիռը, կլինեն քաղաքական և տնտեսական հետևանքներ»,-ասվում է գրառման մեջ։

Արցախի տեղեկատվական շտաբն ապրիլի 23-ին հայտնել էր. «Ադրբեջանական կողմը, հերթական անգամ կոպտորեն խախտելով 2020թ. եռակողմ հայտարարության դրույթները և շարունակաբար ապատեղեկատվություն տալով Հայաստանից Արցախ զենքի տեղափոխության վերաբերյալ, փակել է Արցախ-Հայաստան սահմանագծին գտնվող Հակարիի կամուրջը, որը գտնվում է ՌԴ խաղաղապահ զորակազմի պատասխանատվության տիրույթում՝ Լաչինի միջանցքում»։ Այնուհետև Ադրբեջանի պետական սահմանապահ ծառայությունը հայտարարել էր, որ հսկիչ անցագրային կետ է տեղակայել Լաչին-Ստեփանակերտ ճանապարհին։