Հայաստանի եւ Թուրքիայի մերձեցումը ձեռնատու էր Ադրբեջանի հակաթուրքական շրջանակներին: Ավելին, Ռուսաստանը շատ ուշադիր է հետեւում վերջին իրադարձություններին այս ուղղությամբ: Կարելի է ասել, որ Ռուսաստանը մի ոտքով հաստատվել է Երեւանում, իսկ մյուսով` հայ համայնքի շարքերում: Այս մասին է գրում Սեդաթ Լաչիները «Turkish Weekly»-ի «Ռուսաստանը որոգա՞յթ է լարում Ադրբեջանի համար» հոդվածում:

Ըստ հոդվածի հեղինակի, հենց Ռուսաստանն է այսօր կրկին կանգնած Հայաստանի քայլերի ետեւում, իսկ ԱՄՆ-ի եւ ՌԴ-ի մերձեցման մասին ցանկացած լուր Ադրբեջան է հասնում խիստ չափազանցված: Այս համատեքստում Թուրքիային մեղադրում են դավաճանության համար: Բացի այդ, առաջին պլան են մղվում փաստարկներն այն մասին, թե Ադրբեջանը պետք է «շրջվի դեպի Ռուսաստանը»:

Հոդվածում մեղադրանքներ են հնչում ՌԴ-ի հասցեին, որը փորձում է վերահսկել Ադրբեջանին` համադրելով տարբեր քաղաքական լծակները: Փորձելով մենաշնորհել ադրբեջանական գազի փոխադրումը, Մոսկվան կանգ չի առնում Բաքվի հասցեին հնչող ուղղակի սպառնալիքների առեջւ եւ այս համատեքստում նա ձգտում է փչացնել Թուրքիայի եւ Ադրբեջանի հարաբերությունները:

Անդրադառնալով ղարաբաղյան խնդրին` թերթը գրում է, որ ադրբեջանական ղեկավարությունը բոլորովին չի ողջունում հակամարտության կարգավորմանն ուղղված Թուրքիայի ջանքերը եւ խնդիրն արագ լուծելու նրա ջանքերը նյարդայնացնում են Բաքվին:

Ստեղծված իրավիճակը լավ բան չի խոստանում ադրբեջանա-թուրքական հարաբերություններին: Եթե Բաքուն զիջի Ռուսաստանին էներգետիկմ միջանցքի իրավունքները, ինչը նրա պետական ինքնիշխանության կարեւորագույն հենարանն է, ապա նույնիսկ Թուրքիան չի կարողանա փրկել Ադրբեջանին,-գրում է «Turkish Weekly»-ն: