22 սեպտեմբերի 2023 - 12:26 AMT
Փորձագետ․ Հաքերային լուրջ հարձակում են գտել ՀՀ պետկառույցների և օդանավակայանի դեմ

Մեդիափորձագետ Սամվել Մարտրոսյանը հայտարարել է , որ հայտնաբերվել է լուրջ հաքերային հարձակում պետական կառույցների և «Զվարթնոց» օդանավակայանի դեմ, որն իրականացվել է սեպտեմբերին։

Դա տեղի է ունեցել Արցախի վրա հարձակումից մի քանի օր առաջ:

«Կլինի հետագայում ավելի մանրամասն հետազոտություն։ Բայց այս պահին կարևոր էր զգուշացնել։ Մենք դեռ ուսումնասիրում ենք հնարավոր իրականացնողներին հասկանալու համար։ Բայց հարձակումն իրականացվել է Արցախի վրա հարձակվելուց մի քանի օր առաջ»,–ասվում է գրառման մեջ։

Ադրբեջանը սեպտեմբերի 19-ին Արցախի դեմ լայնամասշտաբ հարձակում է իրականացրել՝ ամբողջությամբ զանգվածային հրետակոծության տակ առնելով Արցախը, այդ թվում՝ Ստեփանակերտը։ Սեպտեմբերի 20-ի առավոտվա դրությամբ մի շարք քաղաքներից ու գյուղերից ավելի քան 7000 մարդ էր տարհանվել, առնվազն 200 զոհ կա և 400 վիրավոր։ Բաքուն հայտարարել էր, որ չի դադարեցնի ռազմական գործողությունները, մինչև Արցախի ՊԲ-ն վայր չդնի զենքերը, ԱՀ իշխանությունն էլ չլուծարվի: Սեպտեմբերի 20–ին հայտնի դարձավ, որ ԱՀ իշխանություններն ընդունել են ռուսական խաղաղապահ առաքելության հրամանատարության առաջարկությունը կրակի դադարեցման վերաբերյալ, ըստ էույթան համաձայնվելով Բաքվի պայմաններին՝ ՊԲ զինաթափում և լուծարում։ Սեպտեմբերի 21–ին հանդիպում է տեղի ունեցել Եվլախում Բաքվի և ԼՂ ներկայացուցիչների միջև, որի ընթացքում որևէ կոնկրետ համաձայնություն ձեռք չի բերվել։