Արմավիրի մարզի Մուսալեռ բնակավայրի Ֆրանց Վերֆելի անվան միջնակարգ դպրոցի տնօրեն Նաիրա Սֆարյանը մանրամասներ է ներկայացրել դպրոցում տեղի ունեցած դեպքից, որի արդյունքում աշակերտների ինքնազգացողությունը վատացել է, մի քանիսը տեղափոխվել են բուժկենտրոններ, հայտնում է «Հայկական ժամանակը»։

Ավելի վաղ լուրեր տարածվեցին, որ Մուսալեռի վարչական տարածքում ֆրանց Վերֆելի անվան միջնակարգ դպրոցից 15-ից ավելի երեխա տեղափոխվել է՝ մի մասը «Վաղարշապատ» բժշկական կենտրոն, մի մասը՝ Մուսալեռի բժշկական ամբուլատոր կենտրոն, մի մասին էլ տեղափոխել են Երևանի տարբեր հիվանդանոցներ: Eրեխաների ինքնազգացողությունը վատացել է։

Ըստ նրա՝ հերքվել է տեղեկությունը, թե դպրոցում գազի արտահոսք է եղել, պատճառը երեխաներից մեկի կողմից դպրոցում, այսպես կոչված, «պերցովկայի» օգտագործումն է (ինքնապաշտպանության համար նախատեսված գազի բալոն):

«Առաջին անգամ եմ այսօր այդ բառը լսել։ Երեխան էլ դա գտել է Երևանի փողոցներից մեկից, այսօր էլ հետը բերել դպրոց, մեզ գցել այս կրակի մեջ։ Լավ է, որ պարզվեց, ոստիկանների շնորհիվ երեխան խոստովանանք գրեց»,- ասաց նա։

«Պերցովկա» օգտագործած տղան 10-րդ դասարանից է, փչել է դա 2-րդ և 3-րդ դասարաններ տանող աստիճանների մոտակայքում, դպրոցի պատուհաններից փոքր քամի է եղել, որն էլ այն տարածել է հարկերով։

«Մենակ կանգնած է եղել, չգիտեմ՝ խելքն ինչ է փչել, որ անի։ Մենք մի աղջիկ ունեինք, որը սրտի խնդիրներ ունի, երեխեքը սկսեցին հազալ, հիմա էլ գրիպի սեզոն է, ես սկսեցի տարհանել, Շտապօգնություն կանչեցի, պարզվեց՝ այդ «պերցովկան» քիթ-կոկորդը գրգռելու հատկություն ունի։ 6 երեխա տեղափոխեցինք Շտապօգնության միջոցով, երեքը անմիջապես են դուրս գրվել։ Երեխայի արարքից տուժել է նաև նրա քույրը։ Լավ տղա է, լավ էլ սովորում է, չէինք սպասում նման բան»,- հավելեց ուսումնական հաստատության ղեկավարը:

Ավելի վաղ Փարաքար համայնքի փոխհամայնքապետ Գոռ Սարիբեկյանը «Հայկական ժամանակի» հետ զրույցում ասել էր, որ, ըստ նախնական վարկածի, գազի արտահոսք է եղել: