32 տարի առաջ Լեռնային Ղարաբաղի Մարաղա բնակավայրում հայերի ջարդերը դարձան Ադրբեջանի էթնիկ զտման քաղաքականության մի մասը։ Այդ մասին ասվում է ԱԳՆ հայտարարության մեջ, որը հրապարակվել է ապրիլի 10–ին X-ի միկրոբլոգում։

«Ավելի քան 50 խաղաղ բնակիչ գազանաբար սպանվել է, շատերը գերեվարվել են, հայ բնակչության մյուս մասը, մոտ 5000 մարդ, բռնի տեղահանության ենթարկվել։ Դա փաստագրվել է իրավապաշտպան կազմակերպությունների զեկույցներում, ինչպիսիք են Human Rights Watch–ը և Amnesty International–ը։

Մենք հարգանքի տուրք ենք տալիս անմեղ զոհերի հիշատակին և շեշտում նման քաղաքականությունը կանխելու անհրաժեշտությունը»,–ասվում է գրառման մեջ։

Ադրբեջանի զինված ուժերը 1992 թվականի ապրիլի 10-ին ջարդեր են կազմակերպել Արցախի Հանրապետության Մարտակերտի շրջանի Մարաղա գյուղում։ Ադրբեջանցիների կողմից սպանվել է ավելի քան 50 հայ, այդ թվում՝ 30 կին, պատանդ է վերցվել մոտ 50 հայ, այդ թվում՝ 9 երեխա և 29 կին։