Ժողովրդավարական ուժերի հարթակը՝ հանձինս «Հանրապետություն», «Հանուն Հանրապետության», Հայաստանի Եվրոպական կուսակցությունների և քաղաքացիական հասարակության ներկայացուցիչների, նախաձեռնում է ԵՄ-ին Հայաստանի անդամակցության հանրաքվեի վերաբերյալ համապետական ստորագրահավաք անցկացնելու գործընթաց։ Այդ մասին ասել է «Ազատ քաղաքացի» հասարակական կազմակերպության ղեկավար Հովսեփ Խուրշուդյանը։

Նա նշել է, որ հունիսի 21-ին Ժողովրդավարական ուժերի հարթակի առաջարկով խորհրդարանական լսումներ էին կազմակերպվել հայտնում է Արմենպրեսը։

«Ժողովրդավարական հարթակի ներսում և համակիրների լայն շրջանակում կա համախոհություն, որպեսզի Եվրոպական միությանը Հայաստանի անդամակցության թեմայով հանրաքվեն անցկացվի։ Այդ հարցով եղել են նաև հանդիպումներ և քննարկումներ իշխանությունների տարբեր ներկայացուցիչների հետ, բայց առայժմ վերջնական համախոհություն չկա այդ հարցում։ Համենայնդեպս, կա որոշում, որ մենք շարունակում ենք այդ ուղղությամբ աշխատանքը և Ժողովրդավարական հարթակը նախաձեռնելու է այս հարցով ստորագրահավաք սկսելու գործընթաց»,- ասել է Խուրշուդյանը։

«Հանրապետություն» կուսակցության նախագահ Արամ Սարգսյանն իր հերթին նշել է, որ Հայաստանի հանրությունը և քաղաքական դաշտն արդեն երկու-երեք ամիս է՝ քննարկման թեմա են դարձրել Հայաստանի կողմից Եվրամիության անդամակցության հայտ ներկայացնելու հարցը։

«Ինչի՞ց առաջացավ դրդապատճառը, որպեսզի խնդիրը փորձենք լուծել հանրաքվեի միջոցով։ Դա մեր առաջարկին Հայաստանի գործող իշխանության մոտեցման ու վերաբերմունքի արդյունքն էր։ Երբ Հայաստանի արտաքին գործերի նախարար Արարատ Միրզոյանը հայտարարեց, որ COP-29-ից հետո կարող են սահմաններին նորից խժդժություններ լինել, մենք մտածեցինք, թե նման պարագայում արտաքին քաղաքական ինչ լծակներ ունենք ինչ-որ կերպ դա մեղմելու և թույլ չտալու համար։ Եվ այդ առումով առաջարկեցինք մեր անվտանգության բազան ավելացնել նաև Եվրամիությանը հայտ ներկայացնելու առումով»,- ասել է Սարգսյանը։

«Հանրապետություն» կուսակցության նախագահն անդրադարձել է ՀՀ Ազգային ժողովի եվրոպական ինտեգրման հարցերի մշտական հանձնաժողովի նախագահ Արման Եղոյանի հայտարարությանը, թե իշխանությունը նպատակահարմար չի համարում հանրաքվե անցկացնելը և որ Ժողովրդավարական հարթակի փաստարկները հանրաքվե անցկացնելու վերաբերյալ հիմնավոր չեն։

Նա նշել է, որ հիմնական արգումենտը ժողովրդի քվեն է՝ 50,000 ստորագրություն հավաքելը և ներկայացնելն Ազգային ժողովին։

«Մենք հասկանում ենք, որ 50 հազար ստորագրություն հավաքելը՝ այն էլ մեր օրենսդրության պայմաններում, բավականին բարդ խնդիր է, բայց համոզված ենք, որ 2 միլիոն ընտրողի մեջ միանշանակ 50 հազար մարդ կա, որ կուզենա, որ Հայաստանը անդամակցի Եվրամիությանը։ Հույս ունենք, որ օգոստոսի առաջին կեսին կհասցնենք ձևավորել թե՛ նախաձեռնող խումբը, թե՛ ԿԸՀ-ից փաստաթղթեր վերցնելը»,- նշել է Սարգսյանը։

Հուլիսի 1–ին վարչապետ Նիկոլ Փաշինյանը Ժողովրդավարության հայկական ֆորումի ժամանակ, անդրադառնալով ԵՄ անդամակցության հարցով հանրաքվե անցկացնելու առաջարկին, ասել էր, որ չի կարող պատասխանել այն հարցին, թե ԵՄ-ն ինչքանո՞վ է պատրաստ մոտ լինել Հայաստանին։ Նա հավելել էր, որ այսօր ԵՄ-ում էլ են տեղի ունենում պրոցեսներ, որոնք պետք է գնահատենք։

ՀՀ ԱԺ–ում ԵՄ-ին անդամակցության հայտ ներկայացնելու հարցը հանրաքվեի դնելու վերաբերյալ լսումներ են անցկացվել։ Լսումները նախաձեռնել էր արտախորհրդարանական 4 ուժ` «Հանուն հանրապետության» կուսակցությունը, «Հայաստանի եվրոպական կուսակցությունը», Հանրապետություն» կուսակցությունը, «Ազատ քաղաքացի» ՀԿ–ն, որոնք միավորվել են «ժողովրդավարական ուժերի հարթակում»։